قْصِيدْتِي شَجْرَةْ
***
قْصِيدْتِي رْسَمْتْهَا شَجْرَةْ
وْراَقْهَا حْرُوفْ رِشْقَة
جْدُورْهَا بِتُرْبَة مْغْبُورَة
ؤُعْرَوشْهَا فِسْمَا مْشْكُورَة
غَلَّتْهَا بِينْ نَاسْ مَشْهُورَة
...
قْصِيدْتِي دَخْلَتْهَا سُوسَة
حْرُوفْهَا عَدُوهَا مْجُوسَة
ضَاخَتْ رَجْعَتْ مَلْهُوسَة
حَزْنَاتْ صَبْحَتْ مَفْقُوسَة
بِسْبَابْ إِدِينْ مَنْحْوسَة
...
قْصِيدْتِي ضَلْهَا نَعْمَةْ
تْفُوحْ بِلْعِطْرْ نَسْمَةْ
فِعِينْ لَعْدًو تَغْرَةْ
تْخَلِّي حْيَاتُو نَكْدَةْ
ؤُ بِينْ لَحْبَابْ مْحَبَّةْ
...
قْصِيدْتِي رَمَزْ لْمَعْنَةْ
لِبْلَادِي أَرضْ لْحَكْمَةْ
سَاخْطَةْ عَلْ لَغْوَالَةْ
دُوكْ لَحْرَمَيَّةْ سْفَالَةْ
مَ دُومْ مْعَهُمْ عَشْرَةْ
...
قْصِيدْتِي بِهَا م نَسْخَا
عْدُيَنْهَا دْرْبَتْهُمْ تَلْفَة
ؤُهِيَ كُلْ يُومْ تَرْقَا
لْخَوْنَة إِدَّارُو فْجَفْنَة
فِزْبَلْ كَسْدَتْهُمْ َطَرْمَا
...
شعيب صالح المدكوري
تامسنة 15.08.2018
Aucun commentaire:
Enregistrer un commentaire